Yârab beni kavuşdur dârü's-selâm-ı yâre

Rûhumda iştiyâkım çokdur o huld-zâre

Yok yok hatâ cennet reşk-âver-i cinândır

Bir zerre hâki erhac bin dürr-i şâhvâre

Sînâ-yı pür-tecellâ muzlem bunun yanında

Zîrâ bu Tûru Mevlâ bizzât eder enâre

Fahr etse hakkı vardır gayrı mükevvinâta

El-hak o medfen olmuş mahbûb-ı Kirdigâre

Bir i'tilâ sayılmaz 'arş-ı berîne çıkmak

'Ulviyyet-i hakîkî yüz sürme ol mezâra

Ey kudsiyâna kıble 'uşşâka cây-ı kuble

Ârâm-gâh sensin müştâk-ı bî-karâre

Cismim nedir ki olsun yârin ayak türâbı

Rûhum da olsa hiçdir mefrûş o reh-güzâre

Vird-i likâ-yı pâkin verdi safâ-yı kudsî

Geldi hezâr neş'e tab'-ı dil-i hezâre

Ey âlemîne rahmet, ser-âşinâ-yı vahdet

Kulluk büyük sa'âdet sen şâh-ı kâmkâre

Âlem-fedâ-yı 'aşkın kurbâna meyl eder mi?

Her dem rebî'-i hüsnün hâcet mi kor bahâre

Nûr-ı cemâle nisbet, mehtâb sanki şeb-tâb

Mihr-i visâle nisbet hurşîd bir şerâre

Pâ-bûsa irmedikçe, cânânı görmedikçe

Etmez kabûl-i merhem rûhumdadır bu yâre

Ey kurb-gâh-ı Yezdân, mahbûb-ı lâ-mekân-şân

Şevkinle kalb-i Vahyî her lahza pâre pâre

Ben derd-mend-i zârım, gâyet günâhkârım

Senden ümîd-vârım kâfî bana bu çâre

Receb Vahyî

Mahfil Mecmuası

Sayı: 52

Sayfa: 68